ენერგეტის განვითარების თანამედროვე ეტაპზე დიდი მნიშვნელობა ენიჭება განახლებადი და ალტერნატიული ენერგიების გამოყენებას. ასეთი ენერგიები უხვად არსებობს ბუნებაში. მათ შორის ჩვენს ირგვლივ და მათი გამოყენება ხელმისაწვდომია. პრაქტიკამ აჩვენა, რომ განახლებადი ენერგიების გამოყენება არის ეკონომიკურად მომგებიანი, ამავე დროს ეკოლოგიურად მიზანშეწონილი.
მზისა და ქარის ენერგეტიკული ტექნოლოგიები ეკოლოგიურად სუფთა და ხელმისაწვდომია. მათ შეუძლიათ შეცვალონ ან შეავსონ ელექტროენერგიის მიღების ტრადიციული მეთოდები. მზის , ქარის და სხვა განახლებადი ენერგიების გამოყენების რეალიზაცია შეიძლება მოხდეს ჰიბრიდული ელექტროენერგეტიკული სისტემის შექმნით, ასეთი სისტემა იმუშავებს ავტონომიურად ან არსებულ ელექტროქსელთან პარალელურ რეჟიმში.
ხშირ შემთხვევაში მზის რადიაციის მატება და ქარის არსებობა ერთმანეთს არ ემთხვევა. ამიტომ უწყვეტი ელექტრომომარაგების უზრუნველყოფისათვის საჭიროა ენერგიის დამაგროვებლების ე. ი. აკუმულატორული ბატარეიების გამოყენება.
ნაშრომში განხილულია ჰიბრიდული ელექტროენერგეტიკული სისტემის მოდელი, რომელიც მიზანშეწონილია განთავსდეს საუნივერსიტეტო კორპუსების სახურავებზე და ელექტროენერგიით მოამარაგოს ამ კორპუსში არსებული სალექციო აუდიტორიები და ლაბორატორიები. აგრეთვე გამოყებულ იქნას ის სტუდენტებისათვის როგორც კვლევის ობიექტი. განხილული ჰიბრიდული ელექტროენერგეტიკული სისტემა ძირითადად მოიხმარს მზის და ქარის ენერგიას. ამასთან დაკავშირებით გამოკვლეული იქნა კონკრეტული საუნივერსიტეტო კორპუსი. კერძოდ მოხდა თვეების მიხედვით მზის დასხივების და ქარის სიჩქარის ცვლილების გაზომვა და ანალიზი. აგებულია შესაბამისი დიაგრამები.
ნაშრომში აგრეთვე წარმოდგენილია ჰიბრიდული ელექტროენერგეტიკული სისტემის მუშაობის ამსახველი ბლოკ-სქემა. ნაჩვენებია ამ სისტემის მუშაობა ცვლადი დენის ქსელთან პარალელურ რეჟიმში. შექმნილია მისი უწყვეტი და მდგრადი მუშაობის ალგორითმი.
გამოყენებულია ჰიბრიდული სისტემების ოპტიმიზაციის პროგრამული უზრუნველყოფა - HOMER, რომელიც უზრუნველყოფს სისტემის ოპტიმიზაციას მისი პრიორიტეტების- გამომუშავებული ენერგიის დაბალი ფასის და გარემოს მინიმალური დაბინძურების მიხედვით.